對好多人來講,養寵物嘅考慮係地方,金錢同時間.
但是對我來講,除咗以上嘅情形,重要面對好強烈嘅壓力.我先生因為工作嘅關係,幾年前有了哮喘,醫生話係敏感,發作咗就以後都會有呢個病.
當時我老爺,奶奶同大伯都要我丟哂的貓.個陣有乖乖同寶寶,乖乖已經有七歲,寶寶得三個月大,如果唔要乖乖佢實死,因為佢唔見我就會唔開心,太耐嘅話,仲會絕食添.寶寶就有街坊話幫我收養.
我個陣好唔開心,同老公嘅屋企人搞到好僵,又唔捨得唔要佢地,我老公話唔駛咁煩,佢橫掂都要去大陸度做嘢,重要周圍飛,唔會成日係香港,而且醫生話如果啲貓唔係佢嘅致敏原,同屋企保持乾淨,都唔會咁易發作.
所以件事就咁settle咗.依家乖乖已經走咗,我老公知我實在太鍾意佢地,所以都支持我領養卡萊,不過佢就唔俾佢地上佢個身同入我地間房,有時見卡萊興高采烈想佢抱,但係俾佢拒絕嘅失望表情,真是好可憐,個時我就會同卡萊講,daddy唔抱得你,等媽咪錫番你啦.
其實我老公真係對我好包容,係度真係要講句多謝哂,老公我愛你.
沒有留言:
張貼留言