前幾日知道貓貓人嘅大頭病咗,真係好担心,其實我地做主人嘅,真係好怕啲囝囝囡囡有事,貓貓人講到'寧願自己病,都唔想佢病!'真係講出哂我地做人父母嘅心聲!
1990年我由香港島搬入黎新界,有一次係街上見到有人賣狗仔,個條友仔仲大大聲話用黎炆就最好喇!我見到個隻可憐嘅唐狗仔好傻氣咁以為自己搵到主好人家,佢點知道啲人係買佢返去食架!
終於佢成為左我第一隻養嘅乖女喇,取名"力力",身價係$35元正.從此我地好開心咁生活,直到有一日我老媽子唔小心俾佢走咗出街,唔見咗幾個鐘,我係公司急忙趕返黎,好彩搵番佢,但係阿力未做絕育手術,所以就即刻安排,個陣元朗無獸醫,我就同佢去咗旺角太平道嘅獸醫度做手術,點知惡夢開始喇!
唔知點解,阿力做完手術之後,得咗個怪病,佢對耳仔成日好似有野咬咁,佢不停咁fing個頭,仲猛咁用腳去抓對耳,對耳俾佢搞到流血,佢連行都行唔到直線,睇親醫生就要麻醉佢,前後都成5,6次,都搵唔到原因.
每次佢麻醉咗我都好驚佢醒唔返,係咁拖拖拉拉咗一段時間,見佢好辛苦,我亦都心力交瘁,聽從醫生嘅建議,俾佢安祥咁離開,唔駛再受病魔嘅折磨.
見到啲寶貝病,真係慘過自己病,最慘係佢地唔可以話到俾你聽佢地邊度唔舒服,要慢慢去搵原因,啲醫藥費就好似倒水咁.
錢駛咗唔緊要,最緊要係有得醫!
希望大頭努力,快啲好番,貓貓人你要加油呀,我地好多人支持你架!
沒有留言:
張貼留言