與醫生的一席話

覆診了,所有的指數都不理想,猶其是壞膽固醇的數據最不好.

以下是對話內容:

醫:  唔!唔係咁理想.以你膽固醇嘅度數,其實要開始食降膽固醇藥,不過我就俾多6個月時間比你去改善,其實都係病從口入,以後要食清淡啲,少鹽少油.

我: 知道喇!( 好似特赦咁!)

醫:  食咗幾個星期降血壓藥覺得點?今朝姑娘同你度都仲係好高喎!

我:  今朝因為要空肚,所以我無食到粒藥,可能要見你所以緊張啫!

       (醫生都好靚仔吓!哈哈!)

醫:  唔!食藥之後嘅每日記錄都唔錯,有無覺得邊度唔舒服?

我:  我覺得自己有啲抑鬱,情緒低落.

醫:  (大反應)係咩!點解覺得係咁?

我:  以前如果啲人做得唔好,做唔到我要求,或者激嬲我.我就會即刻發火.伊家我好似俾 唔到反應,無曬火氣.覺得無氣力,要等到過咗下晏先會識鬧人.唔知係咪啲藥力過咗先正常番.

醫;  (笑)係呀!我未聽過食咗降血壓藥會有情緒嘅問題,我諗係你身體未適應啫.本應我想俾長啲時間嘅藥比你,而家你就食多6個星期呢隻藥,如果仲有咁嘅感覺,或者更加差,你就要聯絡番我,可能會轉過第二隻藥.

我:  仲有,我老公成日唔俾我郁,又唔俾我搞野,咁好悶嫁麻!

醫:  (笑淫淫)佢做乜唔俾你搞野呀!搞啲野好呀!咁你想搞啲乜吖?

我:  翻新全屋油漆囉!

醫:  (估唔到嘅表情)哦!唔怪得佢唔俾你搞野啦!!!