新年做阿四

12月送走咗啲屋企人,又開始忙過年.

雖然我已經唔再蒸糕,但係打理一頭家上上下下真係唔簡單.

今日年初八,終於可以休息吓!

個雪柜一年先得過年至咁滿,一日3餐都要自己煮,我住呢度街市年初六至開

每年都會擺年花,不過班大帝一定會搞破壞,我今年啲銀柳俾佢地咬曬落黎當波踢,而水仙因為有毒,所以唔可以俾佢地咬到,擺位都要費啲心思

班友仔成日聚埋想搞搞震

桃花都要擺出門口,一對年桔更加不可少

今年啲氣溫好唔正常,桃花好多都未開

就係咁,好快就過咗個年!

 

 

 

久違了

十二月份好忙,因為遠在加拿大姊姊和二哥倆夫婦都一起回香港,好不熱鬧,和他們去了些地方,好幾年都未曾這麼齊人了.

沒有忘記我家的貓兒嗎?還是那麼樣,在享福呢!

兩兄妹排排坐,

兒時照,係咪大左又靚左呢?

成日都一齊搞搞震,

阿柑有時都好百厭架!

肥卡萊做左大家姐,好有氣焰!

********

剛剛睇完Lisa個blog,柑桔以前係叫珠圓玉潤,個名真係好娘,呢兩隻幸運嘅貓咪能夠黎到我屋企做左皇帝,都係要多謝Lisa同一斑貓義工嘅好心人,希望CCP貓義工來年一切順利,幫到更加多嘅流浪動物搵到幸福快樂嘅家!

 

想貓

從來就袛有他們最能觸動我的情緒.

祈福

我柑柑每日都會好誠心咁同媽媽祈福.希望媽媽身體健康.

阿哥你唔好阻住我祈福啦!

如果無咗媽咪照顧我地,我地點會有覺好瞓,你睇阿桔同爹地瞓得幾C服

因為媽咪好勤力咁打掃屋企,趁住佢抺梳化,我地又玩一餐

我大隻桔舉手撐腳支持阿柑嘅'祈福大行動'

我肥卡都'瞓身'支持呀!!!!!

與醫生的一席話

覆診了,所有的指數都不理想,猶其是壞膽固醇的數據最不好.

以下是對話內容:

醫:  唔!唔係咁理想.以你膽固醇嘅度數,其實要開始食降膽固醇藥,不過我就俾多6個月時間比你去改善,其實都係病從口入,以後要食清淡啲,少鹽少油.

我: 知道喇!( 好似特赦咁!)

醫:  食咗幾個星期降血壓藥覺得點?今朝姑娘同你度都仲係好高喎!

我:  今朝因為要空肚,所以我無食到粒藥,可能要見你所以緊張啫!

       (醫生都好靚仔吓!哈哈!)

醫:  唔!食藥之後嘅每日記錄都唔錯,有無覺得邊度唔舒服?

我:  我覺得自己有啲抑鬱,情緒低落.

醫:  (大反應)係咩!點解覺得係咁?

我:  以前如果啲人做得唔好,做唔到我要求,或者激嬲我.我就會即刻發火.伊家我好似俾 唔到反應,無曬火氣.覺得無氣力,要等到過咗下晏先會識鬧人.唔知係咪啲藥力過咗先正常番.

醫;  (笑)係呀!我未聽過食咗降血壓藥會有情緒嘅問題,我諗係你身體未適應啫.本應我想俾長啲時間嘅藥比你,而家你就食多6個星期呢隻藥,如果仲有咁嘅感覺,或者更加差,你就要聯絡番我,可能會轉過第二隻藥.

我:  仲有,我老公成日唔俾我郁,又唔俾我搞野,咁好悶嫁麻!

醫:  (笑淫淫)佢做乜唔俾你搞野呀!搞啲野好呀!咁你想搞啲乜吖?

我:  翻新全屋油漆囉!

醫:  (估唔到嘅表情)哦!唔怪得佢唔俾你搞野啦!!!

 

 

身體抱恙

唉!去完新加坡返黎,唔夠兩日就病咗,差唔多成個禮拜先好返,患病期間,係診所量血壓,發現高咗好多,成177/117,家庭醫生話可能係感冒影響到,等感冒好番先至算.但係我懷疑未去旅行前已經係咁.

發覺個心跳得好厲害,仲唔瞓得,成日手腳冒汗.老公即刻同我睇專科,佢驚我有心臟病.伊家做咗初步檢查,唔係個心有事,但係血壓就過高,專科醫生要我食降血壓藥同去水丸,減低高血壓對腎臟嘅影響,我E家足足瘦咗成6磅有多,日日度住血壓,正常番好多,最緊要瞓得好啲.

月尾要再去抽血,要搵出血壓高嘅原因,咁大個囡都未驗過身,今次真係黎一次'驗明正身'呀!!!!

新加坡美食

去到新加坡,更係唔會放過呢到啲美食,不過好可惜因為掛住食,好多時都唔記得影相,唯有繪影繪聲咁試吓用文字形容俾大家聽啦!

第一日,因為4點幾先至起飛,去到新加坡過埋移民局都成8點有多,重要到酒店check-in,所以飛機餐當係晚餐喇,我驚會肚餓,搭的士前食多個老麥算數.

三日早餐都係係酒店嘅餐廳食,無乜特別,亦唔方便影相,當日午餐去咗牛車水嘅Maxwell  Food Centre度食海南雞飯,呢間野好出名,不過我就覺得一般,我老公排隊都排咗成半粒鐘..

我就走咗去買黑菜頭棵(即係炒蘿蔔糕)..

加多一碗魚肉魚湯米線,(用新鮮魚肉起肉炸香,泮新鮮魚湯)不過阿囡話唔夠荃灣個'三鮮魚湯米線'啲湯底咁正喎!

三杯凍飲,左前:鮮草荳奶,右前:菁檸水,後中:鮮草凍飲.

                          鮮草即涼粉.

下午都係附近嘅China Town 蹓蹥,呢個車仔檔啲糕點都唔錯,唔太甜,竹筒糕因為太飽無食到..

夜晚我地就係呢條食街度食..

個晚主菜係呢個,辣椒蟹,超好味,隻蟹好新鮮,不過真係好辛辣..

我加左波菜豆腐同檸檬雞,同樣好好食.

將波菜搞成波菜糊,舖係豆腐上,加紫菜幾片,然後炸香,伴冬菇絲蠔油汁,檸檬雞就同西檸雞差唔多!

串燒我地反而無食,因為好似話要至少十串上,我地得3丁人.點食得曬,況且香港啲串燒成日都食到,放棄算吧.

第3日去咗烏節路(Orchard Road),lunch 入咗個商場嘅Food Court度食,無影到相,因為都係食湯麵,但係就食咗好好食嘅甜點....

綠色嘅全部有加班蘭葉,好香唔太甜,yummy呀!!!!

新加坡地道食品都好濃味,唔係偏甜就係偏咸,所以個晚我想食清啲,咁就去Clarke Quay度食日本野....

呢餐係全程最貴嘅消費,食咗S$110幾.

好喇咁就講完,如果大家有興趣,就去玩吓食吓啦!!!!