尋日幾經辛苦,排除萬難,終於係夜晚8點幾先攞到阿桔啲尿液樣本,急急送去診所,返到屋企都未得閒飲杯茶,電話已到,說尿液樣本嘅數據顯示阿桔啲尿液中含有晶體,而且尿液好稀,懷疑個腎可能有問題,今朝一早要同佢驗血.
結果成晚眼光光,非常担心,阿桔咁細個,如果有腎病真係好慘.
今朝醫生同樣講返尋晚嘅情況,話啲尿液正常唔會咁稀釋,除非係大量飲用水,我答唔通係我呢幾日不時force feed佢飲水,同埋尋日因為missed咗佢一次小便,所以係咁每一個鐘就灌佢飲水,醫生都話有咁嘅可能,anyway都要驗血.
數據出咗,我阿桔腎臟指數正常,醫生話佢應該係尿道發炎,食7日抗生素就會好番.不過佢都係建議阿桔轉食處方糧,可以改善佢尿液晶體嘅情況.我問佢可唔可以同其他貓一齊轉埋,咁樣可以方便我餵食,佢答ok.
好開心,今日係除夕,新嘅一年將到,我係度祝大家新年進步,身體健康!!
Happy New Year! Go! Go! Go!
桔: 媽媽我無事你唔駛唔開心喇! 我會聽教聽話架喇!
媽: 聽住先喇!
今朝阿桔成朝出出入入個厠所,但係都無尿,因為有3隻貓都唔知邊隻痾過邊隻冇痾,佢呢個情況都有4至5日,不過今朝就特別頻密,所以急急同佢睇醫生.
獸醫檢查過佢膀胱就無覺得個膀胱發脹,佢地試過同阿桔攞啲尿液,不過攞唔到,原來佢已經痾咗係個貓箱啲毛巾度.
獸醫話有3個可能:
1.最近有環境變遷,引發有心理壓力;
2.因為有壓力,導致膀胱有啲組織脫落,所以阻礙排尿,這個可能性多是由本身嘅貓貓基因引致;
3.有尿結石
所以要化驗阿桔啲尿先可以肯定係乜野原因.醫生同佢打咗支消炎止痛針,希望佢去厠所可以舒服啲,同埋開咗啲修復膀胱嘅藥丸佢食.
醫生仲俾咗包唔會吸尿嘅砂俾我,所以今日全日都要留守係屋企,服侍呢位大少.
桔: 媽媽,我唔舒服又駛咗你幾多錢呀?
媽: 多到你呢一世都還唔曬呀!
桔: 吓!邊有咁多呀!明明聽到姑娘話$485.
媽: 咁奏到你牛龜咁大,唔算數牙!!!!!!!
呢輪唔知搞乜,郁吓都整親自己.
有日要煮豉油雞,將隻雞放高等佢風乾,隔咗幾個鐘,伸長手攞隻雞時,拉親條腰骨,痛到我 死死吓!
前幾日扭傷隻左手,尋日輪到右手,我覺得自己好似啲機械人,硬'骨骨'咁,死得!!!!
今日仲搞笑,食食吓雲吞麵,見到有個中年女子拉著個非洲黑人唔放,後面有另外一個中國籍女子同另外一個非洲男人,無幾耐原先個位女士俾人整暈咗,跟住兩個黑人就扭埋一堆,仲齊齊look咗落地.之後好多差人黎到,俾人追住唔放果個黑人全程講啲唔咸唔淡嘅英文,啲軍裝唔多識聽,跟住啲差人問有無人見到當時嘅情形,竟然無人出聲(其實當時都有幾十人係度圍觀),聽啲CID講話個女人係個男人嘅ex-girl friend,俾佢見到佢同另外一個女人拍拖,咁佢咪想同佢攞番以前送俾佢隻金錶,個女子嘅現任黑人男士見女友俾人撞暈咗,就拉住對方唔俾佢走,就係咁我又一次做好市民,跟咗佢地返警局,無端端唔見咗粒幾鐘.不過就學識咗原來唔出手打人係唔會俾人告打架嘅,互相拉扯唔屬於邢事.
今日睇貓貓人個卜,話大白貓同毛毛個腎都開始有啲唔好.其實我伊家如果係屋企都強制性喞水俾佢地飲,因為佢地真係好懶飲水.問過獸醫佢話我咁做係無意義,因為一隻貓正常要飲400ml嘅水分先得,基本上你係無可能做得到,不過我唔理,做得幾多得幾多啦,我唔想佢地咁快個腎有病.每日三隻都齊齊刷牙,盡量keep住口腔清潔,真係難為天下父母心!!!!
